ਫਲੋਰੀਡਾ ਹਾਦਸੇ ਵਿੱਚ ਤਿੰਨ ਦੀ ਮੌਤ, ਭਾਰਤੀ ਮੂਲ ਦੇ ਹਰਜਿੰਦਰ ਸਿੰਘ ਉੱਤੇ ਕਤਲ ਦੇ ਮਾਮਲੇ ਦਰਜ – ਰਾਹਤ ਲਈ 27 ਲੱਖ ਤੋਂ ਵੱਧ ਹਸਤਾਖਰ

ਫਲੋਰੀਡਾ/ਕੈਲੀਫ਼ੋਰਨੀਆ – ਫਲੋਰੀਡਾ ਦੇ ਟਰਨਪਾਈਕ ‘ਤੇ 12 ਅਗਸਤ ਨੂੰ ਹੋਏ ਵੀਭਤਸ ਸੜਕ ਹਾਦਸੇ ਵਿੱਚ ਤਿੰਨ ਲੋਕਾਂ ਦੀ ਮੌਤ ਤੋਂ ਬਾਅਦ 28 ਸਾਲਾ ਹਰਜਿੰਦਰ ਸਿੰਘ ਉੱਤੇ ਮੋਟਰ ਵਾਹਨ ਕਤਲ (vehicular homicide) ਅਤੇ ਮੈਨਸਲਾਟਰ (manslaughter) ਦੇ ਤਿੰਨ-ਤਿੰਨ ਮਾਮਲੇ ਦਰਜ ਕੀਤੇ ਗਏ ਹਨ।

ਇਸ ਮਾਮਲੇ ‘ਚ Change.org ‘ਤੇ ਦਾਇਰ ਪਟੀਸ਼ਨ ‘ਤੇ ਹੁਣ ਤੱਕ 27 ਲੱਖ ਤੋਂ ਵੱਧ ਲੋਕਾਂ ਨੇ ਦਸਤਖ਼ਤ ਕਰਕੇ ਰਹਿਮ ਦੀ ਮੰਗ ਕੀਤੀ ਹੈ।

ਫਲੋਰੀਡਾ ਹਾਈਵੇ ਪੈਟਰੋਲ ਅਨੁਸਾਰ, ਕੈਲੀਫ਼ੋਰਨੀਆ ਦੇ ਰਹਿਣ ਵਾਲੇ ਹਰਜਿੰਦਰ ਸਿੰਘ ਨੇ 12 ਅਗਸਤ ਦੀ ਦੁਪਹਿਰ 3 ਵਜੇ ਦੇ ਕਰੀਬ ਆਪਣੇ 2024 ਇੰਟਰਨੈਸ਼ਨਲ ਟਰੱਕ-ਟ੍ਰੇਲਰ ਨਾਲ ਨਾਰਥਬਾਊਂਡ ਲੇਨ ਤੋਂ “ਕੇਵਲ ਅਧਿਕਾਰਿਕ ਵਰਤੋਂ ਲਈ” ਬਣੇ ਕੱਟ-ਥਰੂ ਰਸਤੇ ਰਾਹੀਂ ਗੈਰਕਾਨੂੰਨੀ ਯੂ-ਟਰਨ ਲੈਣ ਦੀ ਕੋਸ਼ਿਸ਼ ਕੀਤੀ।

ਇਸ ਦੌਰਾਨ ਪਿੱਛੋਂ ਆ ਰਹੀ 2015 ਕ੍ਰਾਇਸਲਰ ਮਿਨੀਵੈਨ ਟਰੱਕ ਨਾਲ ਟਕਰਾ ਗਈ। ਹਾਦਸੇ ਵਿੱਚ ਮਿਆਮੀ ਦੇ 54 ਸਾਲਾ ਵਿਅਕਤੀ, ਪੋਮਪਾਨੋ ਬੀਚ ਦੀ 37 ਸਾਲਾ ਔਰਤ ਅਤੇ ਫਲੋਰੀਡਾ ਸਿਟੀ ਦਾ 30 ਸਾਲਾ ਨੌਜਵਾਨ ਮਾਰੇ ਗਏ।

ਹਰਜਿੰਦਰ ਸਿੰਘ ਨੂੰ 22 ਅਗਸਤ ਨੂੰ ਕੈਲੀਫ਼ੋਰਨੀਆ ਤੋਂ St. Lucie County Jail ਵਿੱਚ ਟਰਾਂਸਫ਼ਰ ਕੀਤਾ ਗਿਆ। 23 ਅਗਸਤ ਨੂੰ ਉਸ ਨੂੰ ਪਹਿਲੀ ਵਾਰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਛੇਵੇਂ ਦੋਸ਼ਾਂ ਲਈ ਜ਼ਮਾਨਤ ਨਾ ਦੇਣ ਦਾ ਫ਼ੈਸਲਾ ਹੋਇਆ। ਅਦਾਲਤ ਨੇ ਦਲੀਲ ਦਿੱਤੀ ਕਿ ਕਿਉਂਕਿ ਉਹ ਗੈਰਕਾਨੂੰਨੀ ਤੌਰ ‘ਤੇ ਅਮਰੀਕਾ ਵਿੱਚ ਵੱਸ ਰਿਹਾ ਸੀ, ਇਸ ਲਈ ਜ਼ਮਾਨਤ ਨਹੀਂ ਦਿੱਤੀ ਜਾ ਸਕਦੀ।

ਫਲੋਰੀਡਾ ਦੇ ਵਿਭਾਗ ਅਨੁਸਾਰ, ਹਰਜਿੰਦਰ ਸਿੰਘ ਭਾਰਤ ਤੋਂ 2018 ਵਿੱਚ ਮੈਕਸਿਕੋ ਬਾਰਡਰ ਰਾਹੀਂ ਗੈਰਕਾਨੂੰਨੀ ਤੌਰ ‘ਤੇ ਦਾਖਲ ਹੋਇਆ ਸੀ। ਉਸ ਨੇ ਕੈਲੀਫ਼ੋਰਨੀਆ ਵਿੱਚ ਵਪਾਰਕ ਡਰਾਈਵਰ ਦਾ ਲਾਇਸੈਂਸ ਪ੍ਰਾਪਤ ਕੀਤਾ ਸੀ। ਹਰਜਿੰਦਰ ਸਿੰਘ ਕੋਲ ਟੈਂਪਰੇਰੀ ਵਰਕ ਪਰਮਿਟ ਹੈ, ਜਿਸ ਦੇ ਤਹਿਤ ਉਹ ਅਮਰੀਕਾ ਵਿੱਚ ਕਾਨੂੰਨੀ ਤੌਰ ‘ਤੇ ਕੰਮ ਕਰ ਸਕਦਾ ਹੈ। ਉਸ ਦਾ ਇਮੀਗ੍ਰੇਸ਼ਨ ਕੇਸ ਅਜੇ ਵੀ ਅਦਾਲਤ ਵਿੱਚ ਸੁਣਵਾਈ ਹੇਠ ਹੈ।

ਪੰਜਾਬ ਦੇ ਪਰਿਵਾਰ ਨੇ ਵੀ ਹਰਜਿੰਦਰ ਸਿੰਘ ਲਈ ਰਾਹਿਮ ਦੀ ਮੰਗ ਕੀਤੀ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਹਾਲਾਂਕਿ ਹਰਜਿੰਦਰ ਨੇ ਇੱਕ ਗਲਤੀ ਕੀਤੀ ਹੈ, ਪਰ ਉਸਨੂੰ ਸਖ਼ਤ ਸਜ਼ਾ ਨਹੀਂ ਮਿਲਣੀ ਚਾਹੀਦੀ। ਪਰਿਵਾਰ ਵੱਲੋਂ ਜ਼ੋਰ ਦਿੱਤਾ ਗਿਆ ਹੈ ਕਿ ਉਸਦਾ ਟੈਂਪਰੇਰੀ ਵਰਕ ਪਰਮਿਟ ਅਤੇ ਅਮਰੀਕਾ ਵਿੱਚ ਅਦਾਲਤੀ ਇਮੀਗ੍ਰੇਸ਼ਨ ਕੇਸ ਹਾਲੇ ਪੇਂਡਿੰਗ ਹਨ, ਇਸ ਲਈ ਹਲਕੀ ਸਜ਼ਾ ਦੇ ਕੇ ਹੀ ਮਾਮਲੇ ਨੂੰ ਨਿਪਟਾਇਆ ਜਾਣਾ ਚਾਹੀਦਾ ਹੈ।