Asia
ਅਮਰੀਕੀ ਟੈਰਿਫ਼ ਨਾਲ ਭਾਰਤੀ ਨਿਰਯਾਤਾਂ ‘ਤੇ ਵੱਡਾ ਝਟਕਾ
ਅਮਰੀਕਾ ਵੱਲੋਂ ਭਾਰਤੀ ਨਿਰਯਾਤਾਂ ‘ਤੇ 50 ਫੀਸਦੀ ਟੈਰਿਫ਼ ਲਗਾ ਦਿੱਤਾ ਗਿਆ ਹੈ, ਜੋ ਬੁੱਧਵਾਰ ਤੋਂ ਲਾਗੂ ਹੋ ਗਿਆ। ਇਸ ਕਦਮ ਨਾਲ ਟੈਕਸਟਾਈਲ, ਗਹਿਣੇ, ਸਮੁੰਦਰੀ ਖੁਰਾਕ, ਫਰਨੀਚਰ ਆਦਿ ਵਰਗੇ ਮੁੱਖ ਸੈਕਟਰਾਂ ਨੂੰ ਸਭ ਤੋਂ ਵੱਧ ਨੁਕਸਾਨ ਹੋ ਸਕਦਾ ਹੈ।
ਅਧਿਕਾਰਕ ਸੂਤਰਾਂ ਅਨੁਸਾਰ, ਭਾਰਤ ਅਤੇ ਅਮਰੀਕਾ ਵਿਚਕਾਰ ਗੱਲਬਾਤ ਦੇ ਚੈਨਲ ਖੁੱਲ੍ਹੇ ਹਨ ਅਤੇ ਇਸ ਮੁੱਦੇ ਦਾ ਹੱਲ ਲੱਭਣ ਲਈ ਯਤਨ ਜਾਰੀ ਹਨ। ਸਰਕਾਰ ਦਾ ਕਹਿਣਾ ਹੈ ਕਿ ਨਿਰਯਾਤਾਂ ਦੀ ਵਿਭਿੰਨਤਾ ਕਾਰਨ ਟੈਰਿਫ਼ ਦਾ ਪ੍ਰਭਾਵ ਐਨਾ ਗੰਭੀਰ ਨਹੀਂ ਹੋਵੇਗਾ ਜਿੰਨਾ ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ।
ਉਦਯੋਗ ਜਗਤ ਦਾ ਮੰਨਣਾ ਹੈ ਕਿ ਇਹ ਹਾਲਾਤ ਅਸਥਾਈ ਹਨ ਅਤੇ ਭਾਰਤ ਲਈ ਨਵੇਂ ਬਾਜ਼ਾਰਾਂ ਦੀ ਭਾਲ ਕਰਨ ਦਾ ਮੌਕਾ ਵੀ ਬਣ ਸਕਦੇ ਹਨ। ਵਪਾਰ ਮੰਡਲ ਹੁਣ ਯੂਰਪ, ਲਾਤੀਨੀ ਅਮਰੀਕਾ ਅਤੇ ਅਫ਼ਰੀਕਾ ਵਰਗੇ ਖੇਤਰਾਂ ਵਿੱਚ ਨਵੀਆਂ ਸੰਭਾਵਨਾਵਾਂ ਦੀ ਖੋਜ ‘ਚ ਜੁਟ ਗਿਆ ਹੈ।
ਭਾਰਤ ਸਰਕਾਰ ਵੱਲੋਂ ਨਿਰਯਾਤਕਾਰਾਂ ਲਈ ਵਿੱਤੀ ਸਹਾਇਤਾ ਅਤੇ ਨਵੀਂ ਵਪਾਰਕ ਨੀਤੀ ਤਿਆਰ ਕਰਨ ‘ਤੇ ਵੀ ਵਿਚਾਰ ਕੀਤਾ ਜਾ ਰਿਹਾ ਹੈ।
ਸੰਪਾਦਕੀ ਟਿੱਪਣੀ
ਅਮਰੀਕੀ ਟੈਰਿਫ਼ ਪੰਜਾਬ ਵਰਗੇ ਰਾਜਾਂ ਲਈ ਵੀ ਚੇਤਾਵਨੀ ਹੈ। ਪੰਜਾਬ ਦਾ ਉਦਯੋਗ, ਖ਼ਾਸਕਰ ਟੈਕਸਟਾਈਲ, ਖੇਡਾਂ ਦਾ ਸਮਾਨ ਤੇ ਖੇਤੀ ਨਾਲ ਜੁੜੇ ਉਤਪਾਦ, ਅੰਤਰਰਾਸ਼ਟਰੀ ਬਾਜ਼ਾਰ ‘ਤੇ ਵੱਡੇ ਪੱਧਰ ‘ਤੇ ਨਿਰਭਰ ਹਨ। ਜੇਕਰ ਭਾਰਤ ਦੇ ਵਪਾਰਿਕ ਸਬੰਧਾਂ ਵਿੱਚ ਰੁਕਾਵਟ ਆਉਂਦੀ ਹੈ ਤਾਂ ਇਸਦਾ ਸਿੱਧਾ ਨੁਕਸਾਨ ਪੰਜਾਬੀ ਕਿਸਾਨਾਂ ਤੇ ਮਜ਼ਦੂਰਾਂ ਨੂੰ ਝੱਲਣਾ ਪਵੇਗਾ।
ਇਹ ਸਮਾਂ ਹੈ ਕਿ ਪੰਜਾਬ ਸਰਕਾਰ ਕੇਵਲ ਖੇਤੀ ‘ਤੇ ਨਿਰਭਰ ਰਹਿਣ ਦੀ ਬਜਾਏ ਉਦਯੋਗਿਕ ਵਿਭਿੰਨਤਾ, ਸਟਾਰਟਅਪਸ ਅਤੇ ਐਕਸਪੋਰਟ-ਅਧਾਰਿਤ ਯੋਜਨਾਵਾਂ ਨੂੰ ਤਰਜੀਹ ਦੇਵੇ। ਨਹੀਂ ਤਾਂ ਬਾਹਰਲੇ ਟੈਰਿਫ਼ਾਂ ਦਾ ਭਾਰ ਸਿੱਧਾ ਪੰਜਾਬ ਦੇ ਘਰ-ਘਰ ਤੱਕ ਪਹੁੰਚੇਗਾ।